Subsydzje isolaasje eigen wenning

• Gevelisolaasje
• Flierisolaasje
• Boaiemisolaasje
• Souder/flieringisolaasje
• Dakisolaasje fan binnenút of fan in plat dak
• Dakisolaasje fan bûtenôf
• HR++-glês/HR++ tripleglês, isolearre kezynpaniel- of in isolearre doar

Jo kinne al subsydzje krije foar 1 isolaasjemaatregel. De isolaasjemaatregels moatte dien wêze nei 1 jannewaris 2024. De wurksumheden moatte klear wêze foar 31 desimber 2026.

Ekstra betingsten foar dakisolaasje fan bûtenôf en spoumuorre-isolaasje

Dit komt omt wy bisten, bygelyks flearmuzen, dy’t yn jo hûs libje, beskerme wolle by it isolearjen. De ekstra betingsten binne:

• It is wichtich dat jo kieze moatte foar in isolaasjebedriuw dat wurket neffens de metoade ‘Natuurvriendelijk insoleren’. Der is in list makke mei gaadlike bedriuwen. Sjoch foar mear ynformaasje op de webside Natuurvriendelijk isoleren.
• It isolaasjebedriuw folget de natuerkalinder. Jo kinne de maatregels net elke moanne útfiere litte. Jo fine de natuerkalinder ek op de webside Natuurvriendelijk isoleren.
• Jo wenning moat earst natuerfrij makke wurde. De bisten moatte earst feilich fuortkomme kinne foardat it isolearjen begjint. Dit docht it isolaasjebedriuw.
• Foar dizze maatregels jildt dat der per kalinderjier per buert mar in beskaat tal huzen isolearre wurde mei. It isolaasjebedriuw wit hokker buerten al ‘fol’ sitte.
• Jo moatte wenje yn in wenning mei in terras of tún. In appartemint mei bygelyks net.

Dit is in tydlike wurkwize. Wy wurkje oan in plan om derfoar te soargjen dat ferduorsumjen en beskermjen fan bisten lykop geane.

• Jo binne eigener fan de wenning yn de gemeente Ljouwert en bewenje dy.
• Jo wenning hat it enerzjylabel D, E, F of G.
  • Hat jo wenning gjin fêststeld enerzjylabel? Dan moatte minimaal 2 fan de folgjende besteande boudielen net of min isolearre wêze: de flier en boaiem, de gevel (dêrûnder spoumuorre), it dak en de souder/flieringflier, de ruten en doarren.
• Jo wenning hat in maksimale WOZ-wearde fan € 268.000 (peildatum 1 jannewaris 2022).
• Jo kinne per adres/húshalding 1 kear gebrûk meitsje fan dizze subsydzje.

De isolaasjemaatregels dy’t jo útfiere of útfiere litte, moatte oan in oantal betingsten foldwaan. Foar alle maatregels jildt dat it materiaal op de meldkoadelist fan de Rykstsjinst foar Undernimmend Nederlân (RVO) stean moat. Jo fine dizze meldkoadelisten op de webside fan de RVO. Dit giet om normale wenningen. Foar monuminten sjoch de bylage fan de subsydzjeregeling op de webside fan Overheid.nl (lokaal).

Dakisolaasje of souder- of flieringisolaasje (mei meldkoade)

• Minimaal 20 kante meter fan it besteande dak wurdt isolearre. Of as de souder of fliering net ferwaarme is, wurdt op syn minst 20 kante meter fan it oerflak fan de besteande souder- of flieringflier isolearre.

Gevelisolaasje (mei meldkoade)

• Op syn minst 10 kante meter fan it besteande oerflak fan de binnen- of bûtengevel wurdt isolearre.

HR++-glês/HR++ tripleglês, isolearre kezynpaniel- of in isolearre doar (mei meldkoade)

• Minimaal 8 kante meter fan it besteande oerflak wurdt ferfongen. Foar monuminten jildt in minimum oerflak fan 3 kante meter.

Flier- of boaiemisolaasje (mei meldkoade)

• Op syn minst 20 kante meter fan it oerflak fan de besteande flier of de besteande boaiem wurdt isolearre.

Jo kinne maksimaal € 2.150 oan subsydzje oanfreegje. Foar in monumint is dit maksimaal € 2.500.
Kostje de útfierde maatregels mei-inoar minder as dit bedrach? Dan kinne jo maksimaal it totaalbedrach fan de maatregels oanfreegje. As jo biobased isolaasjemateriaal brûke, dan kinne jo de subsydzje mei 10 prosint ferheegje oant in maksimum fan € 200,-.  Dit jildt foar normale en monumintale wenningen.

Wolle jo noch mear oan jo wenning dwaan en hawwe jo in leech ynkommen? De gemeente Ljouwert hat noch in subsydzje.

Sjoch foar mear ynformaasje op de side Subsydzjeregeling enerzjybesparjende wenningmaatregels. Dizze subsydzjeregeling hat as ekstra betingst dat jo in leech ynkommen hawwe (net heger as € 48.625 bruto yn it jier). Der jilde deselde betingsten foar it enerzjylabel en maksimale WOZ-wearde fan jo wenning. Mooglik kinne jo fan beide subsydzjes gebrûk meitsje, sadat jo noch mear oan jo wenning ferduorsumje kinne.

De folgjende dokuminten leverje jo yn by de oanfraach:

• In offerte mei jo namme, adres en wenplak derop.
• In omskriuwing fan alle isolaasjemaatregels (en fentilaasjemaatregels) dy’t dien wurde.
  • De namme fan it (isolaasje)materiaal dat brûkt wurdt.
  • It oantal kante meter per maatregel dat isolearre wurdt.
  • De meldkoade fan it brûkte materiaal. As dit net bekend is: alle isolaasjewearden fan de brûkte materialen.

Binne jo fan doel it ferduorsumjen sels te dwaan? Dan leverje jo yn:

• In plan mei de wurksumheden dy’t jo útfiere sille.
• In omskriuwing fan alle isolaasjemaatregels (en fentilaasjemaatregels) dy’t dien wurde.
  • De namme fan it (isolaasje)materiaal dat brûkt wurdt.
  • It oantal kante meter per maatregel dat isolearre wurdt.
  • De meldkoade fan it brûkte materiaal. As dit net bekend is: alle isolaasjewearden fan de brûkte materialen.
• In oersicht mei de ferwachte kosten.
  • Jo kinne allinnich subsydzje krije foar de kosten fan de materialen, net foar jo eigen oeren.

Download it Oanfraachformulier Subsydzjeregeling Isolaasje Eigen Wenning en folje it yn. Stjoer it formulier op nei de gemeente Ljouwert. Jo meie it ek ynleverje op it Gemeentehûs.

Jo stjoere it deklaraasjeformulier dat jo krigen hawwe nei jo oanfraach werom en jo dogge de faktueren derby. Dit moat binnen 4 wike nei ûntfangst fan de faktueren fan de isolaasjemaatregels.

Hawwe jo sels jo wenning ferduorsume? Dan dogge jo ek de faktuer (kassabon) of oerienkomst fan de kochte materialen derby. Hjirop steane jo namme, adres en wenplak.

Nim kontakt op mei de gemeente Ljouwert.

De folgjende regeljouwing finne jo op ’e webside fan Overheid.nl (lokaal):

• Subsydzjeregeling isolaasje eigen wenning gemeente Ljouwert.